كلام مش عيب عن الجنس ؟ ؟

الجنس ..!!

كلمة كفيلة بشد انتباه عدد ضخم من الشباب وفي أي مكان في العالم وفي أي وقت .. سواء كان الحديث عنه بالخير أو بالسوء .. وذلك لأن معظم الشباب بل الغالبية العظمى لا يستطيع الزواج في المرحلة التي يحتاج فيها الشاب فعلا أن يتزوج أو بمعنى أدق حينما تحتاج هذه الغريزة إلى الإشباع .. حاجة كده زي الجوع مثلاً: حينما يصيب الإنسان جوع فإن عصافير بطنه تقعد تنهق وجسده يبقى متوتراً يفكر ويبحث ويعمل من أجل اشباع جوعه .. وبالمثل الجنس غريزة خلقها الله وأوجدها حينما يصل الشاب أو الفتاة إلى مرحلة البلوغ...

-طيب .. بسيطة ما نتجوز عشان ميحصلش أي مشكلة!!

-مانقدرش ..

-ليه؟؟

-أولاً: عشان أنا لسه طالب وقدامي كام سنة على ما أخلص!!

ثانياً: هو أنا أصلاً لاقي أكل .. أنا مش بشتغل .. ومعنديش شقة .. ومعيش فلوس..وأبويا ميت..وأمي في المستشفى .. وأختي بتذاكر .. وأخويا بيلعب في الشارع و... م الآخر مش حينفع!!

وبالتالي أعزائي المشاهدين غريزة موجودة عند كل الشباب تحتاج لإشباعها لكن همّا مش عارفين .. ولأننا بنتكلم عن 20% تقريبأ من سكان مصر في مرحلة الشباب وبنضيف ليهم 4 مليون عانس .. فقد فهم الكثير هذه الحقائق وحاولوا أن يستغلوها من أجل أن يأكلوا لقمة عيش-بالحرام طبعاً- وأنا أتحدث هنا بالتحديد عن وسائل الإعلام..( الجرايد والفضائيات والإذاعات) التي كانت سبب في زيادة حجم المشكلة وبدل ما تحاول تبني في عقولنا وشخصياتنا أو أن تهتم بنقل الحقائق وتغير الأوضاع السيئة ومواجهة الفساد .. حدث الآتي:

*1- قامت جرايد تهدف .. للربح .. لربح فقط!! معتمدة على إثارة الشباب بالمقالات الجنسية والصور العارية ولا تجدها تقدم قيمة أو تنقل خبر أو تحمل فكر أو لها أي فايدة غير كده -جرايد صفرا يعني- جرايد سايبة كل المشكلات اللي غارقة فيها بلدنا وكل البلاد العربية والإسلامية وتلاقي كل مانشتتها..

"القبض على شبكة دعارة تديرها ممثلة"

"قصة الوزير الذي أغرته موديل الإعلانات"

"زوج يقتل زوجته لأنها تخونه مع بتاع الأنابيب"

والغريب إنك تلاقي صفحة الحوادث فيها مجرد تأليف .. وأصغر عيّل يفهم كلامي .. لأن المقالات من غير بيانات ولا أرقام ولا شخصيات ولا محاضر ولا أسماء ظباط .. زي ما أي جريدة محترمة بتعمل في صفحة الحوادث..

والأغرب إنك متلاقيش إلا هذه الجرايد بتتباع أعدادها القديمة في القطر بربع جنيه النسخة لأنها مجرد قصص .. عمرك ما تلاقي الأهرام ولا الدستور ولا الأسبوع بتتباع أعدادها القديمة!! الناس حتعمل بيها إيه؟! .. لكن النبأ والخميس والحادثة والجرايد الصفرا دي ملاينة قصص للتسلية والإثارة!!!

*2- استخدام جسد المرأة في ترويج السلع والإعلان عن المنتجات .. فلا يخلو إعلان عن عربية أو سمنة أو علبة كبريت أو مبيد حشري حتى .. من موديل مصيفة جدا ولابسة من غير هدوم عشان الإعلان ينجح ويشد الأنظار إليه!!

*3- لا تجد فيلم أو مسلسل إلا وتجد فيه مشهد أو شخصية أو أغنية أو القصة كلها أحياناً تتحدث عن الجنس وبأسلوب مبتذل باستخدام الصور والألفاظ والإيحاءات .. أسلوب لا تجد له مبرر إلا الربح .. المال!! مهما كان أثر ذلك على الشباب .. محدش بقى يقعد يغني علينا ويقولنا: الفن رسالة!! وواقعية الفن!! ونقل إحساس ونبض المجتمع!! .. كلام بيتقال في البرامج التلفزيونية وليس له أي دليل أو مصداقية بدليل أفلام أحمد الله أنني لم أراها ولكنني قرأت عنها كثيراً مثل:

النوم في العسل .. وعمارة يعقوبيان .. للفنان القدوة المحترم المؤدب المؤمن .. عادل إمام، وغيرها كتير .. طيب بالله عليكم الأفلام فايدتها إيه؟! .. بتعالج إيه؟! .. هو الفن إننا نتكلم عن الضعف الجنسي لا للعلاج لكن للإثارة؟؟! .. هو الفن إننا نتحدث عن الشواذ لا للتقويم والتغيير .. لكن لإيهام الناس إن الأمر عادي ومنتشر جداً وإن الشواذ ملهمش ذنب ياعيني؟؟!

*4- ظهور كمّ ضخم جداً جداً من الأغاني والكليبات التي تحمل كلماتها ومشاهدها عدد لا يحصى من الإيحاءات والتلميحات الجنسية .. كما ذكرت إحدى الإحصائيات أن 98% من الكليبات العربية تحمل إيحاءات جنسية .. وللأسف هذه الأغاني انتشرت بشكل غريب جداً حتى أصبحت جزء من حياتنا وثقافتنا .. روح أي قهوة أو دكان أو سوبر ماركت أو حتى مستشفى طبعاً كليبات شغالة ليل نهار .. حتى أصبحنا نسمع الأطفال يرددون كلمات هذه الأغاني الإباحية -عادي طبعاً فيها إيه ما هي مجرد أغنية!- مثل:

هذه الأغنية -سامحوني- المقرفة التي ما إن تمشي في شارع أو تذهب إلى مكان إلا وتجدها تخترق ودانك غصب عنك وتجد الفنان يقول: تعالي لي بالليل، فترد الفنانة بأسلوب مهذب رقيق على هذه الدعوة أن تذهب له بالليل فتقول بأسلوب أكتر كلمة محترمة توصفها بيها إنها في قمة الميوعة: وأنا أوريك الويل ، ناكل ونحلي وأعملك الللي .. ألا هو إيه الللي ده؟؟ حاجة في قمة قلة الأدب .. بالله عليكم اللي كتب الأغنية دي .. كتبها ليه؟؟ واللي غناها .. غناها ليه؟؟ فن برضه .. هو الللي ده فن!! فن من أنهي نحية؟؟

ليه وصلنا لهذا الحد من الانحطاط في في إعلامنا؟؟ وليه في ناس لسه بتسمع النوعية دي من الأغاني؟؟ وليه في ناس بتحب تتفرج على هذه النوعية من الأفلام؟؟ وليه في ناس لسه بتشتري الجرايد الصفرا دي؟؟

الفرق بين الإسلام والإعلام

يا جماعة شوفوا الإسلام .. ديننا العظيم .. إزاي اتكلم عن الجنس .. لأن ربنا يعلم إن الجنس غريزة موجودة فينا زي الجوع والعطش .. مش هو اللي خلقنا؟!! وخلق فينا هذه الرغبة ؟!! .. لذلك اهتم الإسلام بتوجيهنا وتوجيه هذه الرغبة فينا بشكل صحيح .. وتعليمنا أدق الأمور في الجنس .. فلم يهمل هذا الأمر .. واهتم بمناقشة الجنس بشكل واضح وصريح ومش بس كده بالتفصيل أحيانا .. فلم يترك مسألة .. أو مشكلة إلا وأتكلم عنها ووجد لها الحل .. في القرآن أو في الأحاديث الشريفة .. بس باحترام .. وباستخدام كلمات مهما كان الأمر خاص جداً إلا أنه لا يثيرك ولا يخدش الحياء أبداً .. فيقول تعالى:

" ويسألونك عن المحيض قل هو أذى فاعتزلوا النساء في المحيض ولا تقربوهن حتى يطهرن فإذا تطهرن فأتوهن من حيث أمركم الله إن الله يحب التوابين ويحب المتطهرين"

بل شجعنا الإسلام على الثقافة الجنسية والمعرفة الجنسية بالأسلوب الراقي .. وشوفوا فرح النبي صلى الله عليه وسلم بإمرأة سألته عن أمر من أمور الجنس فقال"انظروا إلى هذه لم يمنعها حياؤها أن تسأل"

وأيضاً سألت واحدة من الصحابيات النبي صلى الله عليه وسلم" يا رسول الله إن الله لا يستحي من الحق فهل على المرأة من غسل إذا احتلمت؟ قال: نعم إذا رأت الماء"

طبعاً في فرق كبير بين الكلام عن الجنس لتوجيهه وعلاج مشكلاته وبين ناس بيقولوا إنهم فنانين أو صحافيين أو مطربين أو مخرجين وهما..... ولا بلاش، ناس ضايعة وعايزة تضيعنا معاها ويكسبوا من ضياعنا ملايين .. ولأن للأسف في ناس كتير سلموا نفسهم وشهواتهم لهؤلاء وسابوهم يلعبوا بيهم .. فعشان كده أقسمت إني مش حسلملهم نفسي ولا عقلي أبداً ولا حكسبهم من ورايا قرش واحد .. أو أضيع من عمري دقيقة أتفرج فيها على التفاهة بتاعتهم .. ومش حيكونوا أبداً سبب إني أخد ذنب واحد